Saint-Roch Ferrières Saint-Roch Ferrières Photo Saint-Roch Ferrières

Li bilèt dè vî sot

"Hoûte on pô, vî Sot, nos savans qui t' pére èst-èvôye po todi. Ni vôreûs' nin scrîre ti bilèt so ci-ome qu'a tant fê po disfinde noss' vî lingadje ?

Dji vou bin sayî, min qui v'va-dju dîre ? Ine vèye come il a-st-avu eune, fåreû treû lîves èt d'mêye po 'nn'è djåser !

Djan ! dji m'va saye di n'nin fé dès trop longs brouwèts; dji m'contintrè di v'djåser dès-akwintances qu'il aveû avou Sint-Roch.

C'èst vrèye qui, mågré qu'èsteû profèsseûr divin n'sicole dè djåle, i c'nohéve fwér bin noss' colége. C'èst qu'il èsteû l'cuzin d' Paul, li profèsseûr di powèzêye, qu'èsteû come lu, profèsseûr di gréc èt d'latin. (Vos v'rapèlez bin : Doudouche, ou l' Poï, ou l'gros lapin!) C'èst-insi qu'à l'Noyé, à Påque ou bin è meu d'djun, nos vèyîs aplonkî à Ståv'leû, li Cardinål (come on l'nouméve è noss' famile) po v'ni coridjî, avou m'pére, les dissèrtåtions di sès-èlèves: onke lihéve l'ovrèdje, mètéve des ponts podrî l'foye, adon l'passéve à l'ôte qu'èl coridjéve à s'toûr. N'avît pu qu'à mète leûs ponts onke disconte l'ôte.

C'èst-ossu di c'tin-là qu' ine pårtèye dèl famile vinéve à Saint-Roch po-z-ac'pagner lès-opèrètes qui les scolîs djouwî li grand djoû qu' l'Evèque vinéve rimète lès prix ås-èlèves. (Rapèléve : Le Sourd - Joli Gilles - La farce de Mâitre Patelin,...) Min.me qui l'djône violonisse qui djouwéve avou s'papa, avou Edouard Senny, avou l'Abbé Vandeberghe èt bin dès-ôtes, c'èsteû mi ! Come di kwè, sins-avu fê mès-ètudes à Saint-Roch, dji so pu vî Saint-Rochî qui dji n'contéve !

Mi Pére, c'èsteû ossu les prumîrès mèsses è francès qu'on-z-a tchanté (divin l'vîle èglîse... qui n'est pu!). Vi sov'név' bin ? "Graduel" qui çoula s'nouméve...

Po lès mon vîs, mi Pére, c'èsteû-st-ossu "Dialogues", li lîve di latin qui bêcô ont-st-ovré avou.. dè tin qui l'latin (èt min.me li gréc) fî pårtèye di çou qu'on apèléve dès "Hûmanités". Po l'djoû d'oûye, dji n'sais s'on pou co djåser d' hûmanité? Nos djås'rans pu vite di "Modèrnité", là qu'on deû fé d'nos djônes dès djins capåbes di gangnî leû vèye mî qu'lès-ôtes... èt po çoula fåt-i qu'on c'nohe to plin dès lingadjes d'asteûr ! Parètreû qui n'a qu'çoula d'vrèye po-z-aveûr ine foû bèle plèce èt gangnî dès hopês. Adon, å pus' qui nos 'nn'è gangn'rans, å pus' qui nos pôrans språtchî lès p'tits.
Nos pôrans-t-èsse fîr dè fé come lès-Amèrlokes, là qu'i-n-a dès fôu-ritches... èt tot plin dès pôves qui crèvèt d'misére...
Divin l'tin, on d'héve qu'i faléve viké po fé plêzîr ås-ôtes.
Asteûr, qu'ènn'èst-i ? Dès "bodj'tu d'là qui dj'm'y mète!"
Å batche to çou qui n'rapwète nin : li gréc, li latin, li musique qui n'èst nin qu'dès bru, li walon, les longuès sîzes qu'on passéve à copiner...

Hoûte bin, Tchantchès ! T'ènn'a ralé trop timpe po tès-èfants, tès p'tis-èfants èt leûs-èfants... Min qu' dj'arawe, dji n'sais si t'n'as nin bin fê : lès-hûmanisses, po l'djoû d'oûye, si d'vèt k'hagnî tél'min qu'i va fé drole viker !"

Michel Duysinx

Retour